|
Il-Kan. Kantur Dun Karm Cini, iben Gużepp u Reġina
nee’ Cefai, twieled nhar id-19 ta’ Mejju 1938, f’42,
Triq il-Madonna taċ-Ċiċri, iż-Żebbuġ Għawdex u ġie
mgħammed l-għada minn Dun Ġużepp Masini, li kien
qed iservi bħala Vigarju Ekonomu, fil-Parroċċa taż-Żebbuġ.
Il-parrini tiegħu kienu zijuh minn naħa t’ommu,
Franġisk Cefai u zitu minn naħħa t’ommu wkoll Maria
Antonia Cefai, it-tnejn miż-Żebbuġ. Irċieva s-Sagrament
tal-Konfirmazzjoni fid-19 ta’ Awwissu 1945, mill-Isqof
Ġużeppi Pace fil-Knisja Parrokkjali taż-Żebbuġ.
Studja fl-iskola primarja taż-Żebbuġ. Wara, għal xi żmien
minħabba esiġenzi familjari u nuqqas ta’ finanzi ħalla
l-iskola u għen il-familja fir-raba, sakemm ispirat minn
xi persuni fosthom Dun Ġużepp Masini li sadanitattant
kien Rettur tal-Knisja ta’ San Pawl f’Marsalforn, il-
Provinċjal Alfons M. Camilleri (OFM), Madre Ġemma
tas-Sorijiet Franġiskani tal-Qalb ta’ Ġesu’, Frenċ tal-
Għarb u San Ġorġ Preca, fundatur tas-Soċjeta’ tal-Museum, issokta l-istudji tiegħu l-ewwel fil-Kulleġġ tal-
Franġsikani Minuri fil-Kunvent tagħhom f’Għajnsielem
u mbgħad fis-Seminarju Minuri. Dawn l-istudji
eventwalment wassluh biex jibda l-kors ta’ formazzjoni
għas-Saċerdozju fis-Seminarju tad-Djoċesi ta’ Għawdex
fejn kontemporanjament ir-Rettur kien Dun Ġużepp
Mercieca li aktar tard sar Isqof ta’ Malta u l-Prefett tal-
Istudji kien Dun Nikol Cauchi li aktar tard sar Isqof ta’
Għawdex.
Irċieva s-Sud-djakonat fl-1968 mill-Isqof Ġużeppi
Pace u ġie ordnat Djaknu mill-Isqof Nikol Cauchi fit-23 ta’ Marzu 1968 fil-Kappella tas-Seminarju. Ordna
Saċerdot flimkien ma għaxar presbiteri oħra fil-Katidral
ta’ Għawdex fil-11 ta’ Mejju 1968. Iċċelebra l-ewwel
Quddiesa solenni tiegħu fit-18 ta’ Mejju tal-istess sena
fil-Knisja Parrokkjali taż-Żebbuġ.
Dun Karm beda jaqdi l-ministeru saċerdotali tiegħu
bħala Viċi-Parrokku fil-Parroċċa tal-Mellieħa mal-
Kappillan Dun Ġużepp Schembri. Il-ħidma pastorali
tiegħu hawn kienet tinkludi fost l-oħrajn laqgħat ta’
grupp kbir ta’ xebbiet tal-Azzjoni Kattolika. Is-sena ta’
wara nsibuh Assistent Direttur fl-Istitut ta’ San Ġużepp
t’Għajnsielem li kien jospita tfal orfni.
Fis-sena 1973, Dun Karm ġie maħtur Vigarju Sagristan
tal-Knisja Parrokkjali taż-Żebbuġ biex jgħin lill-Arċipriet
Luigi Vella. Kienu waqqaf il-grupp taż-Żgħażagħ u
magħhom kien jorganizza diversi attivitajiet. Fis-sena
1974 insibuh mill-ġdid f’Malta bħala Viċi Parrokku
f’Ħal Kirkop fejn il-Kappillan kien il-Kan. Dun Anġelo
Vella. Darba fit-Tifkira tad-Duluri, Dun Karm għadda
17-il siegħa fil-Konfessjonarju jqarar. F’dik l-istess sena
għamel il-paninġierku tal-festa ta’ San Leonardu patrun
ta’ Ħal-Kirkop. Fl-1975 ġie maħtur Assistent Rettur tas-
Santwarju tal-Madonna ta’ Pinu fl-Għarb, u kien jieħu
ħsieb il-Quddies u l-Qrar fost l-oħrajn. Baqa jaqdi din ilkariga
sal-1982 meta ġie maħtur Assistent Viċi Parrokku
fil-Parroċċa t’Għajnsielem. Fl-1985 beda jaħdem fl-
Uffiċċju Missjunarju li dak iż-żmien kien jopera mill-
Oratorju Don Bosco u f’Novembru tal-1986 ġie appuntat
bħala Assistent Direttur u Teżorier tal-Missjoni l-Kbira
fid-Djoċesi ta’ Għawdex.
Fl-1 ta’ Novembru tal-1999 ġie maħtur Kanoniku effettiv
tal-Kolleġġjata tal-Bażilika tal-Għarb li kien ilu jservi
bħala Kanoniku Onorarju sa mill-24 ta’ Diċembru tal-
1981. Fl-1991 ġie promoss għad-dinjita’ ta’ Kantur.
Dun Karm kien jagħti s-servizz tiegħu ta’ Konfessur
fil-Parroċċi tal-Għarb u l-Għasri, kif ukoll lis-Sorijiet
Agostinjani f’Għajnsielem għal aktar minn 40 sena.
Dan minbarra s-servizz assidwu tiegħu fil-Parroċċa
taż-Żebbuġ fejn kien iqaddes kulljum il-Quddiesa tas-
6.00a.m., iqarar, u Direttur Spiritwali ta’ tlett presidia tal-
Leġjun ta’ Marija u l-fergħa tan-nisa tal-Azzjoni Kattolika.
Dun Karm kien ukoll il-promotur tad-devozzjoni lejn is-
Saċerdot Dun Karm Cachia u waħda mill-ikbar xewqat
tiegħu kienet li l-fdalijiet ta’ dan is-Saċerdot jiġu trasferiti
miċ-Ċimiterju għall-Knisja Parrokkjali – xewqa li saret
realta’ fid-19 ta’ Ottubru 2013. Kien ukoll id-Direttur
Spiritwali tas-Soċjeta’ Filarmonika Santa Marija li kienet
tant għal-qalbu.
Dan l-artiklu deher fir-Rivista 'L-Gholja taz-Zebbug' 2014 |
|