|
Sa minn qabel il-mewt tas-Saċerdot Dun Karm
Cachia, in-nies kienet diġa` żżommu bi bniedem
li għex il-virtujiet erojċi tal-qdusija fl-aqwa
tagħhom. Din l-idea tan-nies kompliet tissaħħaħ wara
mewtu, meta ħafna bdew jitolbu ‘l Alla bl-interċessjoni
tiegħu u jaqilgħu l-grazzji li jeħtieġu. Infatti mhux ftit
kienu dawk li kienu jirrikorru lejn iċ-Ċimiterju Parrokkjali
taż-Żebbuġ biex jitolbu fuq il-qabar tiegħu, imissu xi
oġġetti ta’ devozzjoni miegħu u jixegħlu xi xemgħa jew
iħallu xi fjuri fuqu.
Fil-bidu l-fdalijiet ta’ Dun Karm Cachia kienu midfuna
f’qabar komuni, imma meta tlestiet il-Kappella tal-istess
ċimiterju fl-1964, il-fdalijiet tiegħu ġew trasportati u
mqiegħda fil-qabar tas-Saċerdoti wara l-bieb prinċipali
tal-Kappella. Dikjarazzjoni fir-Reġistru tal-Imwiet u
parċmina bid-dettalji ta’ dan li tpoġġiet f’tubu tallanda
fit-tebut il-ġdid li sar biex fih jitqiegħdu l-fdalijiet
imsemmija f’dan il-post ġdid u aktar dinjituż, jixhdu dan.
Minkejja li għaddew is-snin ġmielhom mill-mewt ta’
dan is-Saċerdot, id-devozzjoni u l-interess lejn din irruħ
twajba ma qatgħux biex ma ngħidux li żdiedu.
Inkitbet il-ħajja tiegħu minn Mons. Ġian Andrea Vella u
ġiet ippubblikata, ħarġet edizzjoni oħra u fi ftit żmien
inħatfet. Ta’ spiss isiru santi bix-xbieha ta’ dan is-
Saċerdot u t-talba għalihom dejjem tkun qawwija.
Ftit tas-snin ilu Saċerdot mill-Parroċċa tagħna, Dun
Frankie Mallia li jinsab jaqdi l-ministeru saċerdotali
tiegħu f’Ruma u li għamel ukoll it-teżi tad-dottorat tiegħu
fuq l-ispiritwalita` ta’ Dun Karm Cachia, issuġġerixxa
lill-Arċipriet preżenti l-Kan. Dun Reuben Micallef
jistħarreġ dwar il-possibilita` li l-fdalijiet ta’ Dun Karm
Cachia jittellgħu miċ-ċimiterju u jinstabilhom post fejn
aktar jixirqilhom u jkunu aktar aċċessibbli – fil-Knisja
Parrokkjali stess. L-Arċipriet mingħajr telf ta’ żmien
ressaq din il-proposta quddiem il-Kunsill Presbiterali tal-
Parroċċa li unanimament qabel u fi ftit ġranet bagħat
rikors lill-E.T. Mons. Mario Grech Isqof t’Għawdex biex
jikseb l-approvazzjoni tiegħu għal dan. Mons. Isqof
wieġeb li ma jsib l-ebda oġġezzjoni anzi japprova l-ħsieb
filwaqt li faħħar l-inizjattiva.
Minnufih bdew għaddejjin id-diskussjonijiet dwar fejn
kellu jkun dan il-post li fih jilqa’ l-fdalijiet ta’ dan is-
Saċerdot. Sar qbil li l-post l-aktar adattat ma kellu jkun
imkien ħlief xi mkien qrib l-artal tar-Rużarju fejn Dun
Karm kien iħobb tant iqaddes.
Ġie kkuntattjat id-disinjatur Emmanuel Cini, Żebbuġi
li jgħix Malta, biex iħejji disinn ħalli jkun jista’ jiġi
ppreżentat quddiem il-Kummissjonijiet kompetenti fil-
Kurja għall-approvazzjoni. Eventwalment l-ewwel idea
li kellna ġiet imwarrba u għalhekk ħdimna fuq xi ħaġa
aktar sempliċi: ħofra mgħottija b’lapida fit-tarġa tal-artal.
Ix-xogħol tat-tħaffir u l-bini tal-qabar żgħir sar minn
Alfred Saliba u ibnu Paul. Ġie rrestawrat ukoll l-artal
kollu li kellu bżonn ta’ manutenzjoni kemm fl-istruttura
kif ukoll fl-istess irħam.
Sadanittant fil-Kappella taċ-ċimiterju, fil-preżenza tal-
Arċipriet il-Kan. D. Reuben Micallef, tal-Kan. Dun Karm
Cini, tal-Kav. Carmelo Saliba, ta’ xi familjari tal-istess
Dun Karm Cachia fosthom żewġ neputijiet tiegħu u bilgħajnuna
ta’ Bertu Mallia, Joey Saliba u Sammy Cefai
saret ir-rikonjizzjoni tal-fdalijiet ta’ Dun Karm Cachia li
kienu jikkorrispondu eżatt mad-deskrizzjoni annessa
fir-Reġistru tal-Imwiet, li aktar tard imbagħad ġew
imneħħija mit-tebut li fih kienu miġbura u mqiegħda
f’urna żgħira tal-injam maħduma minn Bertu Mallia.
Intgħażlet il-ġurnata tad-19 ta’ Ottubru, 2013, lejlet
l-Anniversarju tal-mewt ta’ Dun Karm Cachia. Il-fdalijiet
tiegħu ġew esposti fil-Kappella taċ-ċimiterju sa minn
kmieni wara nofsinhar fejn għadd kbir ta’ devoti marru
biex jaraw u jitolbu bl-interċessjoni tiegħu filwaqt
li ħafna messew mal-istess urna, biċċiet ta’ tajjar u
oġġetti ta’ devozzjoni. Fl-4.30p.m. telaq Korteo mmexxi
mill-Arċipriet u s-Saċerdoti tal-Parroċċa li refgħu
l-urna bil-fdalijiet sal-Knisja Parrokkjali fejn wara saret
Konċelebrazzjoni Pontifikali mmexxija minn Mons.
Isqof Mario Grech, li għaliha attenda bi ħġaru l-poplu
taż-Żebbuġ, flimkien ma’ numru kbir ta’ devoti li ġew
minn kull rokna t’Għawdex għal din l-okkażjoni storika.
Fi tmiem il-Quddiesa tqassmet ukoll santa ta’ tifkira
b’talba fuqha.
Wara l-Konċelebrazzjoni, il-fdalijiet ta’ Dun Karm Cachia
ġew inċensati u mniżżla fil-qabar ġdid imħejji apposta
fl-artal tar-Rużarju.
Sa minn dakinhar, fuq il-qabar ġdid li tant kien jixraqlu,
fil-post li kien tant għal qalbu, ix-xemgħa tixgħel dejjem
- xemgħat li jġibuhom in-nies biex iżommu ħajja t-tifkira
ta’ dan is-Saċerdot twajjeb u jitolbuh jidħol għalihom filħtiġijiet
tagħhom.
Dan l-artiklu deher fir-Rivista 'L-Gholja taz-Zebbug' 2014 |
|