|
Meta ġejt biex nikteb ftit kliem dwar il-ħajja taz-ziju
Dun Anton, ħassejtni fid-dmir sabiex nikkomunika mal-qarrejja
b’mod ċar il-karattru u l-persuna ta’ dan ilbniedem,
li kien meqjus minn bosta nies bħala saċerdot
eżemplari, kalm u onest. Għal dawk li kienu jafuh
personalment, nispera li din il-kitba ġġedded diversi
memorji sbieħ.
Dun Anton, iben Ġużeppi u Roża Dimech, twieled
fiż-Żebbuġ Għawdex, fit-12 ta’ Ġunju, 1940, fejn ġie
ukoll mgħammed l-għada fil-Knisja Parrokkjali taż-Żebbuġ.
F’dan l-istess żmien, id-dinja kienet maqbuda
f’tempesta qalila ta’ gwerer u sofferenzi. Għaldaqstant,
il-bidu tal-ħajja ta’ Dun Anton ma kinitx faċli u sa mill-bidu
tat-tfulija tiegħu kienu diġa` jispikkaw elementi ta’
dixxiplina u sagrifiċċju.
Dun Anton ingħata l-edukazzjoni primarja fl-iskola
tal-Għasri, fejn kien jaħdem missieru. Wara li spiċċa
l-primarja, beda s-sekondarja fil-Liċeo r-Rabat. F’dak iż-żmien
ma kinitx ħaġa ħafifa li wieħed jattendi l-iskola
regolarment meta trasport pubbliku kien ineżistenti.
Hu kien iħobb isemmi kif ta’ kuljum kien jipprepara
l-bagalja u jirkeb ir-rota għall-iskola, xemx jew xita. Fl-adoloxxenza,
Anton skopra l-vokazzjoni tiegħu għas-saċerdozju.
Għalhekk kompla jistudja fis-seminarju
tal-Qalb ta’ Ġesu`, fir-Rabat Għawdex. F’dak iż-żmien,
id-direttur spiritwali ta’ din l-istituzzjoni kien qassis
Żebbuġi, bl-isem ta’ Mons. Andrea Vella. Dan is-saċerdot
kien pilastru importanti fil-formazzjoni ta’ Dun Anton.
L-għajnuna u l-pariri tiegħu dejjem għinuh biex jibqa’
jħares lejn din il-vokazzjoni b’kuraġġ u entużjażmu.
Fil-5 ta’ Ġunju, 1964, Dun Anton ġie ordnat saċerdot
mill-Isqof Giuseppe Pace, fil-Katidral t’Għawdex, fleta`
ta’ 24 sena. Is-saċerdozju tiegħu kien ta’ siwi kbir
għall-parroċċa taż-Żebbuġ. Fil-fatt, hu kien attiv kemm
spiritwalment kif ukoll materjalment fix-xogħol tal-knisja.
F’ħajtu dejjem għamel minn kollox biex jaqdi
lill-parruċċani. Ta’ kull xahar kien iwassal l-Ewkaristija
lill-morda u x-xjuħ fi djarhom. Kellu mod kif jgħallem il-Kelma t’Alla liż-żgħażagħ, filwaqt li jħeġġiġhom sabiex
jgħixuha. L-Azzjoni Kattolika u l-qima lejn Santa Marija
kienu għal qalbu wisq u fost affarijiet oħra, ta’ kull
ġimgħa kien imexxi l-laqgħa għan-nisa adulti. Kmieni kull
filgħodu kien iqaddes il-quddiesa tal-ħamsa u filgħaxija
jispiċċa l-ġurnata bil-barka sagramentali.
Apparti l-knisja, kellu għal qalbu ukoll l-edukazzjoni.
Kien għalliem fis-seminarju t’Għawdex għal sitta u
tletin sena u editur tar-rivista “Il-Ħajja f’Għawdex”
għal diversi snin. Apparti dan, hu kien jipprovdi tagħlim
volontarju lill-istudenti tas-sekondarja tar-raħal tagħna
bi preparazzjoni għall-eżamijet akkademiċi. Ġieli kont
nqatta'
sigħat sħaħ
ma’ sħabi
naħdmu
karti tal-
Malti,
Reliġjon
u Taljan
flimkien
maz-ziju.
Dan kien
ikun meħud
mill-ħin fejn
hu seta’ jmur
jistrieħ jew
jagħmel xi
xogħol ieħor. Ma ninsa qatt il-Pacenzja u t-tbissima li
kien ikollu meta jarana nfittxuh minħabba xi problema
fix-xogħol tal-iskola jew għal kwalunkwe parir ieħor.
Iz-ziju dejjem kien jisħaq mal-ġenituri biex jinvestu fledukazzjoni
ta’ uliedhom. L-akbar sodisfazzjon għalih
kien meta jara l-istudenti, speċjalment dawk tar-raħal
tagħna jiksbu suċċess f’ħajjithom.
Dun Anton kellu diversi passatempi ukoll, fosthom is-sajd
u l-biedja. Meta jara li kien se jkun temp bnazzi, hu
u ħuh Anġlu kienu jaħsbulu biex dritt wara l-quddiesa
ta’ filgħodu jibqgħu sejrin għal sajda bil-frejgatina
“Santa Marija” jew iż-żgħira “Giuseppina”. Is-skiet u
l-ħemda li jafu jagħtu l-ibħra Maltin, ma kienu jibdluha
ma’ xejn. Meta ma jkunx temp tajjeb għas-sajd, lil Anton
kont issibu fl-għelieqi jiżra’ u jħawwel xi ħxejjex għall-borma.
Kienet l-għaxqa tiegħu jara r-raba’ tieħu l-ħajja
meta tagħmel l-ewwel xita. Imbagħad la jasal Awwissu,
kont tarah idaħħan ħdejn il-kaxxi tan-naħal sabiex ikun
jista’ jneħħi l-frejms tal-għasel mimlijin u ssiġillati bix-xemgħa.
Niftakarni meta kont iżgħar nikkompeti ma’
ħuti fuq min ħa jdawwar il-magna tal-għasel l-aktar. Fil-ħin
li kont inqatta’ maz-ziju, bdejt aktar napprezza kemm
il-ġenerożita`, is-sempliċita`u l-ħajja nnifisha, huma
rigali mogħtijin lilna sabiex ngħixuhom u ngawduhom.
Ma ninsa qatt l-aħħar tgħanniqa li tajna lil xulxin, fejn iz-ziju
baqa’ jżomm mal-prinċipji li dejjem saħaq fuqhom
– biex inkomplu ngħinu lil ħaddieħor, filwaqt li qatt ma
nħallu l-pjaċir u l-ġid tad-dinja jirbaħna. Kienu propju
l-istess idejn li bierku u għallmu tant nies, għamlu bosta
sagrifiċċji u ħadmu f’isem ir-raħal tagħna u r-reliġjon
nisranija.
Wara sebgħin sena ta’ qadi fuq din l-art, il-Mulej sejjaħlu
għal għandu. Għalkemm m’għadux magħna fis-sura
tal-ġisem, jiena nemmen li minn hemm fuq, hu għadu
u jibqa’ jeżisti qalb iż-Żebbuġin bħala xempju ħaj ta’
umilta` u sempliċita`.
Dan l-artiklu deher fir-Rivista 'L-Gholja taz-Zebbug' 2014 |
|