|
Jien mort kull naħa t’Għawdex,
Imbarra miż-Żebbuġ;
Naf biss l’hemm nies għaqlija
Jitħabtu mal-maħluġ,
L’hu raħal l-ogħla f’Għawdex,
Is-sħab imiss mad-djar,
In-nies f’taqliba ħarxa
Jitbiegħdu mill-kampnar.
X’dehriet ta’ blat u ħdura,
Ta’ siġar, ta’ għerien,
Tara minn dak il-għoli
-ix-xogħ’l ta’ l-id u ż-żmien-
Il-baħar dawra m’Għawdex
F’tagħniqa ta’ żewġ ħbieb;
Żmien twil għandhom fejn jgħammru
U jduru l-għajn u l-ħsieb.
J.J. Camilleri
Kemm kont inħobbha
din il-poeżija meta
kont l-iskola sekondarja
fis-sittinijiet!
Kull meta kont niftaħ
il-ktieb tal-poeżiji,
kont nitpaxxa bil-melodija
ta’ dan l-eloġju
li Anton Buttiġieġ
għamel f’ġieħ raħal
twelidi. Din il-poeżija
kitibha fit-30 ta’
Lulju, 1936, ftit
qabel il-gwerra.
Allura naħfruhielu:
ma kienx faċli tiġi
ż-Żebbuġ f’dak iż-żmien!
Iż-Żebbuġin kienu
magħrufa sew għax-xogħol
tan-newl: ”jitħabtu
mal-maħluġ”. Numru
sew ta’ Żebbuġin
kellhom xi newl
fid-dar li fuqu
kienu jinsġu lożor,
kutri u affarijiet
oħra bis-suf tan-nagħaġ
jew qoton. In-nies
kienu bdiewa bla
ebda eċċezzjoni.
Kollha kienu jkabbru
tiġieġ, fniek, mogħoż,
nagħaġ, u forsi
xi qażquż jew għoġol
ukoll, fil-bitħa
u fl-imqawel fis-sular
t’isfel waqt li
fis-sular ta’ fuq
kienu jgħixu huma.
Ftit fadal irziezet
minn dawn, bis-setaħ
mikxuf, jew bil-loġoġ,
iħares lejn in-nofsinhar
biex taħkmu x-xemx
ħanina tax-xitwa
jew dik qalila tas-sajf.
Fuq, kien ikollhom
id-dar il-ġdida
fejn kienu jitwieldu
l-ulied numerużi
tal-familja; u oħra,
fejn kienu jieklu
u jorqdu kollha
flimkien. F’tarf
is-setaħ kien ikollhom
kmajra bil-kenur
jew kuċiniera, dejjem
idaħħnu!
Fis-sajf, in-nagħaġ
kienu jġiżżuhom
u s-suf kienu jaħsluh
fil-bajja tax-Xwejni
u jnixxfuh fuq il-blat.
Kienet tkun il-ħarġa
tal-familja! Wara
kienu jinfxuh, jiġifieri
jiftħuh biex ikompli
jaqa’ xi frak li
jkun għad fadal
u s-suf jsir artab
biex jiġi magħżul
jew mibrum fi ħjut
fini jew ħoxnin.
Is-suf irqiq kien
isir lożor bi tliet
xoqqiet u l-oħxon
kien isir kutri,
b’xoqqtejn jew tlieta,
il-ġmiel tagħhom!
Dak iż-żmien, ix-xebbiet
ma kellhomx xogħol
(ħlief forsi jmorru
sefturi f’Malta)
u kollha kienu jafu
jagħżlu s-suf, waqt
li xi wħud kienu
jinsġuh. Kull għarusa
kienet tlesti l-lożor
tas-suf u l-farda
flimkien ma’ mtieraħ,
investi u srievet
tal-qoton abjad
jew aħmar imkabbar
fl-għelieqi tan-nanniet
tagħna. (L-aħħar
li rajt dal-qoton
fl-għalqa kien fl-1955
jew hekk.) Ħafna
minn dawn l-oġġetti
għadhom jeżistu
fil-familji tagħna,
għad li ntużaw ħafna.
Wara l-gwerra kien
għad fadal xi ftit
nissieġa bħall-aħwa
Zahra ta’ Triq il-Mitħna
u Marija Cassar
li għexet ħafna
fi Triq il-Knisja,
u kienet saret punt
ta’ attrazzjoni
turistika fis-sittinijiet
u sebgħinijiet.
Min jaf x’sar minnu
n-newl ta’ Marija
Cassar! Ftit ilu
rajt dak tal-aħwa
Zahra: għadu armat
fil-garaxx! Tgħidx
kemm ħadt gost nara
li għadu fi stat
tajjeb ħafna!
L-uniku ħjiel ta’
dan il-mistier Żebbuġi
li jinsab għall-wiri
huwa l-ilbies tal-vari
tal-Ġimgħa l-Kbira:
ilbies magħmul minn
drapp tal-qoton
aħmar jew abjad
maħluġ u minsuġ
bin-newl. Dan l-ilbies
ħa l-post ta’ dak
oriġinali tal-bellus
ikkulurit. Il-vari
tal-lum ma tantx
jagħtu fil-għajn
u jlewnu l-purċissjoni,
iżda lbieshom aktar
iqarreb lejn l-istil
ta’ lbies ta’ żmien
Kristu. Biċċiet
tan-newl jintużaw
ukoll fil-Wirja
tal-Mejda tal-Appostli
li tintrama fil-każin
tal-Banda.
Illum il-ħajja fiż-Żebbuġ
inbidlet ħafna,
iżda l-poeżija ta’
Anton Buttiġieġ
għadni nħobbha daqs
qatt qabel! U daqstant
għadni nħobb lil
raħal twelidi!!
Dan l-artiklu
deher fir-Rivista
'L-Gholja taz-Zebbug'
2012 |
|